Estes certificaciones, que podrán ser valoraes nos procesos de reconocimientu de méritos que se xestionen dende l’alministración asturiana, entamen a desendolcar, con más de venti años de retrasu, l’artículu 11 de la Llei d’Usu y Promoción del Asturianu

La bona acoyía de la preba de nivel intermediu B2 de certificación d’asturianu, adautá al Marcu Común Européu de Referencia pa les Llingües, con alrodiu de 800 iscripciones na so primer convocatoria, amuesa’l fuerte interés de los asturianos pola so llingua.

Seique los niveles de conocencia son cinco, diendo dende la conocencia básica dica’l gráu espertu  (A1, A2, B1, B2, C1), esti añu namás se ufiertó l’esamen pal nivel B2, y con solo 500 places. Les persones que quedaron fuera de convocatoria nun saben cuando tendrán otra oportunidá pa presentase, ya que’l gobiernu anunció que “convocará esamen al menos una vegá al añu pa polo menos ún de los niveles”, información pocu precisa que podría indicar un segundu esamen nel 2020 o una espera de cincu años fasta que torne a tocar el nivel de competencia Intermediu B2.

La ruinda de les places convocaes dexa a cerca 300 iscritros fuera de la convocatoria 2020. Les almisiones concediéronse en función de los apellíos, decidiéndose la primer lletra -que resultó ser, mui apropiadamente, la xe, n’orde de “z” a “a”- con un sortéu.

Los matriculaos pueden comprebar dende ayeri si s’alcontraben pente los almitios a la preba o si tienen d’esperar a la viniente convocatoria consultando l’ enllaz d’Educastur, col so DNI ya’l códigu que se yos unvió previamente nel so dispostivu móvil, o mirando con esi mesmu códigu nes llistes que tan espuestes nos centros d’inscripción. Los afortunaos tendrán de presentase nel IES Aramo o na Facultá de Formación del Profesoráu ya Educación de la UNIOVI, en Llamaquique.

Nuria Prendes

This work is licensed under a Creative Commons Attribution 4.0 International License.