l’oxetivu del Estatutu del Consumior Lleutrointensivu ye en principiu ameyorar la competitividá de les industries con gran consumu de lleutricidá, que llegaron a carecer diferenciales colos sos competidores de Francia y Alemania de fasta 20 euros/megavatiu hora (MWh), pero de fechu lo que ta ye creando una fienda bien grande pente los territorios del mesmu estáu español, beneficiando mui especialmente a vascos y catalanes, que los sos gobiernos foron quien a negociar condiciones muncho meyores que les algamaes pol gobiernu del “Principado”.
Los vascos, en concreto, consiguen pa les sos industries un “doble privilexu”, al sumar la rebaxa recién consiguía al aforru que tienen dende’l 2018 gracies a la modificación de los nomaos “peaxes d’acesu”, qu’impliquen unos cien millones d’euros menos al añu na so factura llétrica. L’estatutu beneficiará a unes 600 industries vasques -frente a les 19 asturianes- con altu consumu lléutricu, a les que se bonificará nun 85% los cargos de la so factura, lo que yos supondrá un aforru conxuntu que se calcula en más de 262 millones d’euros. La entruga que se planteguen agora mesmo empresarios y sindicatos nun ye porque los vascos tienen estos beneficios, sinón porque nun se consiguieron sofitos equivalentes pa les empreses asturianes.
La consecuencia p’Asturies ye la puesta n’entedichu de la continuidá del furrulamientu d’empreses que precisen d’un ellevaísimu gastu llétricu, comu ye’l casu d’Arcelor, Azsa o Aluibérica, -de les que depende’l puestu de trabayu de miles d’asturianos. Sicasí, la primer reación del “Principado” al conocese les condiciones del estatutu foi positiva, valorando que “cumple colos principales oxetivos: dar estabilidá a la tarifa y meyorar la competitividá de la gran industria” y nun foi fasta que los empresarios industriales lo desixeron que se decidieron a presentar, xunto con Galicia y Cantabria, allegaciones al mesmu.
Nuria Prendes
This work is licensed under a Creative Commons Attribution 4.0 International License.
