123 asturianos aspiren a entrar Mensa

  • 15 Febreru, 2020

Mensa Asturies compónenla anguañu 70 persones con un coeficiente perriba el 98% de la población, pero podíen ser unes cuantes más bien ceo. 123 aspirantes ficieron ayeri un test supervisáu que yos permitirá saber si cumplen los requisitos pa entrar nesti selectu clú social, nel que persones con altes capacidaes inteleutuales busquen alcontrar otres persones con maneres asemeyaes de camentar ya intereses comunes

Mensa (del llatín, “mesa”, en remembranza de la del Rei Arturu) ñació en 1946 n’Inglatera, como un ensame de persones con altes capacidaes que queríen meyorar el mundiu; pero dao la actitú estremada mente crítica d’estes persones nun foi recibía con mui bon aquel pola sociedá de la época. Anguañu, Mensa tien sede en más de 50 países y cuenta con alrodiu de 120.000 socios. Los sos oxetivos son más modestos: identificar y promover la intelixencia en porgüeyu de la humanidá, promover la investigación acerca de la naturaleza, las carauterístiques y les aplicaciones de la intelixencia y crear un ambiente social que fomente la actividá inteleutual de los sos socios, dientro d’una organización horizontal na que los sos socios son iguales en drechos y obligaciones.

Estadísticamente, n’Asturies viven un mínimu de 20.000 persones con Alta Capacidá; sicasí, en MENSA namás son 70 socios y solo 123 s’apuntaron a la preba, malque non toos se presentaron; el resto, o nun conoz l’asociación o, na so gran mayoría, nun son siquiera coscientes de la so intelixencia. Munchos d’ellos son pas y mas de reciella superdotao y reconocese a si mesmu comu tal pue aidalos enforma a comprendelos y sofitalos nel so camín. En xeneral, facese cosciente de la propia peculiaridá aida a pescanciar meyor circustancies y situaciones que se repiten a lo llargo de la vida de cuasi cualisquiera d’estes persones.

Ser Superdotáu nun consiste namás en tener unes habilidades matemátiques impresionantes o en tener una memoria prodixosa, ye más bien una cuestión d’enfocar la vida entera dende otra perspeutiva. Les mentes d’estes persones siguen caminos estremaos a los de la mayoría de la población, deprenden d’otra miente, tienen una alta sensibilidá tantu emocional comu sensorial, tienen intereses, razonamientos y comportamientos que difieren de la media ya en munches ocasiones siéntense refugaos por una sociedá que nun los pescancia y que davezu los marxina. Poro, préstayos conocese y xuntase pa compartir aquello que tienen en común, y eso ye MENSA, “una especie de clú social, como otru cualesquiera, na que los miembros tienen intereses comunes y que facemos actividaes xuntos”, comu desplicaba Cristina Alvarado, coordinadora de Mensa Asturies, anantes de les prebes.

Llucía F. Marqués

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies