El retayu a les beques de comedor escolar dexa a les families d’Uviéu a teyavana

  • 13 Febreru, 2020

El gobiernu bipartitu nun llegó a falar más que con una de les diez Asociaciones de Más y Pás coles que tenía concertaos aconceyamientos anantes d’espublizar la midía

Esmolecios ante la noticia del posible retayu xabaz a les beques escolares municipales pal cursu 2020 – 2021, les Asociaciones de Más y Pás del conceyu d’Uviéu solicitaron un alcuentru col conceyal al cargu d’educación n’Uviéu. En contra de lo qu’esperaben les families, l’Ayuntamientu decide recibir por separtao a les AMPAS, concertando más de diez alcuentros pa falar del tema.

El doce de febreru Jose Luis Costillas (Ciudadanos), Conceyal d’Educación, tuvo’l primeru d’estos alcuentros, despachando a les families con bones pallabres, seique ensin compromisos concretos. Esa mesma nueche, ensin dar oportunidá al resto d’asociaciones, espublizábase na páxina web del Ayuntamientu, de forma oficial, la nuea convocatoria de beques escolares, con toos y caún de los retayos que se temíen.

Les beques pal almuerzu prauticamente desapaecen, cayendo nun 85% y les de comedor más d’un 30%: en total ye cerca d’un millón d’Euros los qu’el gobiernu d’Uviéu pretende aforrar con esta midía.

La decisión d’amenorgar drasticamente les beques escolares de comedor -ensin escuchar a los beneficiarios de los mesmos- afeuta a más de 2.000 families, que perderán la beca y tendrán qu’abonar una media de 1.000 euros más al añu pa que los sos fios puean acudir al comedor escolar.

Esta decisión tómase pocu dempués de la tamién polémica subía de precios del serviciu de comedor escolar del Conceyu Xixón, onde’l PSOE, seique aumentó el númberu y cuantía de les beques escolares, aplicó un xabaz incrementu de preciu al serviciu, de cuasi’l 40%, obligando a dase de baxa a munches families que nun cumplen los requisitos pa la beca, pero que precisen d’esti serviciu.

Los comedores escolares non solo son imprescindibles pa la conciliación llaboral de munches families, sinón que nun país onde cuasi ún de ca tres escolinos tan en riesgu severu de probitú, aseguren al menos una bona comida al día a la reciella. La so desapaición dexa a miles de rapacinos ateyabana.

Nuria Prendes

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies