• Portada
  • >
  • Muyer
  • >
  • Les asturianes destaquen pol so enclín científicu

Les asturianes destaquen pol so enclín científicu

  • 12 Febreiro, 2020

El 51’6% de los estudiantes de Ciencies na Universidá d’Uviéu son muyeres, siendo Asturies un de los territorios con menor fienda de xenero en titulaciones de Ciencia, Teunoloxía, Inxeniería y Matemátiques
Coincidiendo cola cellebración del Díi Internacional de la Muyer y la Neña na Ciencia, Valnalón presentó un informe pa la Conseyería de Ciencia, Anovación y Universidá nel que se reflexa que n’Asturies, al contrariu de lo qu’asocede n’otros territorios del estáu, cuasi la metá de les estudiantes opten por estudios rellacionaos cola Ciencia, Teunoloxía, Inxeniería y Matemátiques (STEM), siendo especialmente alta la incidencia femenina nes carreres científiques, nes que les asturianes superen a los asturianos en númberu.

Esti informe revela qu’el 46,2 per cientu de les estudiantes escueyen estes disciplines, cuasi cuatro puntos perriba la media y solo 0’9 puntos perbaxo de les qu’escueyen Humanidaes. El 6’3 restante opta por una formación rellacionada coles artes.

Asturies, desplicaron na presentación del informe, atópase «llixeramente perriba la media» de la UE y d’España no que cinca a competencies y vocaciones científiques. Entá asina, plantegen tomase midíes qu’igualen más estos porcentaxes, averando a los escolinos a les Humanidaes, carreres nes que los homes son minoría -41%-, y a les escolines a les titulaciones STEM.

La fienda ye mayor n’estudios de Formación Profesional, onde solo una de cada diez neñes matriculaes opten por una disciplina STEM. Trátase d’oficios altamente masculinizaos, comi la lleutrónica, l’automoción o la fabricación mecánica.

Otra tema tratada nesta presentación foi la necesidá d’istaurar midíes que desanicien los efeutos «pergraves» de la maternidá na carrera científica, una opción profesional bien desixente, que ye dificilmente conciliable con una vida familiar na que la muyer sigue siendo la que soporta’l mayor pesu de les responsabilidaes rellacionaes colos fíos. N’esi sen, propunxéronse polítiques empobinaes a favorecer la conciliación o facer una convocatoria de proyeutos empobinada específicamente a científiques qu’escoyeren ser madres.

En términos xenerales, l’informe evidencia un descensu de les vocaciones, con una fuerte cayida de les matrícules tantu en FP comu n’Universidá, onde les titulaciones STEM atraen solo al 30% del alumnáu (homes y muyeres).

Llucía F.Marqués

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies