• Portada
  • >
  • Asturies
  • >
  • Los espertos consultaos nun creen que los diputaos de la Xunta nun pescancien l’asturianu

Los espertos consultaos nun creen que los diputaos de la Xunta nun pescancien l’asturianu

  • 7 Febreru, 2020

El Catedráticu Alejandro Huerga Lora afaló a la Xunta a trabayar na Oficialidá, dao que cualisquier midía que la escluya continuará permitiendo interpretaciones interesaes de les lleis, dando argumentos a los que ven nel drechu de los asturianos una menacia

Dientro la planificación de la reforma del reglamentu la Xunta Xeneral de manera que s’esclarie’l drechu al usu del asturianu, los espertos comparecientes qu’apurrieron los sos conocimientos sobro’l tema punxeron en duda que fore real el desconocimientu del asturianu argumentáu polos diputaos pa torgar les comparecencies nesti idioma, teniendo en cuenta el so orixe asturianu y la cotidianidá del usu d’esta llingua, que fae que incluso les persones monollingües tengan conocimientos básicos que permiten la so comprensión.

La comisión taba compuesta polos Catedráticos de Drechu Alministrativu, Alejandro Huergo Lora y Francisco Bastida Freijedo, l’hestoriador Faustino Zapico, l’esdiputáu Xuan Xosé Sánchez Vicente ya’l presidente de l’Academia la Llingua Asturiana, Xosé Antón González Riaño.

Toos coincidieron al considerar que nun ye posible que los diputaos asturianos desconozan la so llingua hasta’l puntu de nun pescanciar una intervención fecha nella, pero apostaron por una reforma del estatutu na que se contemple esti drechu esplícitamente, con envís d’evitar ambiguedaes y torgar la utilización partidista d’esti argumentu. El casu de la diputada del PP Gloria García, qu’interrumpió la sesión parllamentaria en so díe argumentando nun pescanciar a Berta Piñán, autora de la qu’ella mesma lleera testos publica y voluntariamente nel 2018, espeya nidiamente la intencionalidá disruptora del discursu antiasturianu.

Na intervención  tachóse de “contrasentíu” que los mesmos diputaos qu’afirmen nun pescanciar l’asturianu seyan los que dicen que l’asturianu nun ye un idioma sinón “castellán mal falao”, costatando asina lo ficticio de la so incomprensión. Drechos fundamentales, comu la llibertá d’espresión, tamién foron mencionaos pola comisión, que reconoció la esistencia d’una persecución faza l’asturianu.

El reglamentu vixente de la Xunta indica que “nel marcu lo afitao nel Estatutu d’Autonomía y, en so casu, la llegislación que lu desendolque, los diputaos podrán utilizar el bable nel exerciciu de les sos funciones parlamentarias”, testu que dexa nidio la llegalidá del usu del asturianu; sicasí, la nuea redaición propuesta recueye que “nel marcu lo afitao nel Estatutu d’Autonomía y, en so casu, la llegislación que lu desendolque, tantu los diputaos nel exerciciu de les sos funciones parlamentaries comu cualisquier otra persona que compareza ante la Cámara podrán utilizar el bable/asturianu”.

Sicasí, comu fexo notar el Catedráticu Alejandro Huergo Lora, ensin oficialidad toles midies a tomar tarán “nuna ambiguedá evidente”, afalando a la propia Xunta a encarar la necesaria reforma del Estatutu p’acoyer esti drechu.

Llucía F. Marqués

 

 

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies