Conserves Orbe Porriño y Liberbank Xixón vuelven vese les cares esti vienres. Esti va ser el segundu enfrentamientu ente’l conxuntu gallegu y l’asturianu en menos d’un mes tres l’apostáu’l pasáu 18 de xineru na segunda fase de la XLI Copa de la Reina, que se saldó con un cómodu trunfu de les asturianes
Sumíu na so particular crisis por alloñase de los puestos de descensu, el cuadru d’Ismael Martínez ta obligáu a embrivir erros nesta parte de la temporada pa encarar con garantíes la última fase del cursu. Pa ello, va ser clave empezar a sumar puntos en casa, onde nun gana dende la Xornada 1, cuando venció pola mínima al Helvetia Alcobendas. Precisamente énte’l conxuntu madrilanu llogró la pasada fin de selmana la segunda victoria de la temporada gracies a un gol ‘in extremis’ de Fátima Suaré (21:22).
Pela so parte, el Liberbank Xixón, qu’aprovechaba l’empate la pasada xornada ente’l Mecalia Atléticu Guardés y el Balonmano Elche para faese cola segunda plaza, quier sumar los dos puntos p’afitase y encarar con optimismu esti mes de Febreru nel que se va midir al líder, el Super Amara Bera Bera, y al Balonmano Elche, que nun pierde dende la Xornada4.
La gran novedá va ser el regresu de Cecilia Cacheda a la que fuera la so casa mientres 10 años. La central, que desenvolviera tola so carrera esportiva nel conxuntu gallegu, dexaba’l club el pasáu branu buscando nuevos retos.
El téunicu del Liberbank Xixón, Diego Lafuente, tien a la so disposición a toles xugadores sacante Nerea Nieto, por motivos personales, y reconoz que ‘’l’equipu llega nuna bona situación na clasificación y tamién nun bon momentu de xuegu al qu’esperamos dar continuidá. Porriño ye un rival duru, llevamos dos selmanes xugando contra equipos de la zona baxa de la clasificación que nos punxeron les coses bien difíciles. Creo que ye un equipu perbién iguáu, con un amiestu de xugadores nueves y veteranes, y cuando-yos sal un bon partíu, pueden ganar a cualesquier’’.
Pela so parte, Ismael Martínez alvierte que ‘’ye un equipu que basa’l so xuegu na segunda folada, nel contraataque, y tien un defensa cambiante que xenera munches duldes nel rival. Les claves van tar nel repliegue, en ser bien verticales n’ataque, en xugar enforma colos pivoses y estremos, y ser capaces de defender los un contra un, xuéguennos enforma n’amplitú para abrir espacios. Llegamos un pocu meyor de la tema física y esperamos tener a les 16 disponibles”.
Anabel Morán
This work is licensed under a Creative Commons Attribution 4.0 International License.
