Hai seies vertederos deteutaos nel embalse de San Andrés de los Tacones, en Xixón, un espaciu natural protexíu de calter internacional ensertáu nuna Zona d’Especial Proteición pa les Aves
Reclamen al conceyu de Xixón la clausura y llimpieza d’estos seies puntos prietos, ya que la xestión de residuos ye competencia municipal. L’incumplimientu d’estes obligaciones podría dar llugar a responsabilidaes penales por omisión del deber de torgar quemes forestales, ya que los materiales apinaos nestos vertederos son altamente combustibles.
Pero la consecuencia más evidente d’estos vertederos ye la contaminación ambiental, non solo del puntu onde s’apinen sinon del sosuelu y les agues, por mor de los llixiviaos que se xeneren.
Poro, dende la Coordinadora Ecoloxista d’Asturies vienen de solicitar al Conceyu de Xixón que procedan a retirar les basories y se lleven estos residuoa a un xestor autorizáu; darréu, lo correcho sedría señalizar estes fasteres p’alvertir de que los vertios illegales sedrán sancionaos y pa dar conteníu a estes señales, sancionar afayaizamente a los responsables siempres que se yos puea identificar.
Redaición InfoAsturies
This work is licensed under a Creative Commons Attribution 4.0 International License.
