El Gobiernu del “Principado” prevé aprobar 38 proyectos de llei a lo llargo d’esti mandatu, nueve d’ellos durante esti mesmo añu. Dengún d’ellos contempla meyores pa la situación del asturianu

L’actual presidente del “Principado” xugó la baza elleutoral de la Oficialidá pa remanar votos d’asturianos ilusionaos que creyeron nes sos pallabres, pero nos 38 proyeutos de llei recoyíos na axenda d’equí al 2023 nun se recueye dala midía llingüística.

El Plan d’aniciatives Llexisllatives, ratificáu ayeri pol Conseyu de Gobiernu, presenta la planificación de los prósimos 4 años no que cinca a creación y camudu de lleis. Nelli recuéyense diez estayes: Vicepresidencia y Conseyería d’Infracadarmes, Mediu Ambiente y Camudu Climáticu, con cinco proyeutos de llei, Presidencia, con otros 7, los mesmos que la Conseyería de Drechos Sociales y Bientar; Cinco proyeutos de llei presenta la Conseyería de Facienda, tres la de Desendolcu Rural, Agricultura Ganadería y Pesca y namás dos pa la de Salú. Con un únicu proyeutu de llei pa cuatro años destaquen les Conseyeríes d’Educación, la d’Industria, Emplegu y promoción económica y la de  Ciencia, Anovación ya Universidá.

La décima Conseyería ye la de Cultura, Política Llingüística y Turismu, estaya na que tendríemos d’atopar les midies de proteición y espardimientu del asturianu; sicasí, los cuatro proyeutos plantegaos tan cientraos na Actividá física y Esporte (ensin que quede nidio si esto ye cultura, llingua o turismu), Biblioteques, Museos y Turismu. Nin una pallabra dedicada a la llingua.

Llucía F. Marqués

This work is licensed under a Creative Commons Attribution 4.0 International License.