Los datos apurriós pola Sociedá Asturiana d’Estudios Económicos ya Industriales (Sadei) cifren la superficie amburáo l’añu pasáu en 14.470 hectárees, frente a los 2.066 del añu anterior

Depués de les llacerioses cifres del 2017 – cuando amburaron cuasi 28.000 Ha.- la sociedá en pleno pidió que se tomaren midies de prevención contra les quemes. Los problemes apuntaos yeren dellos: abandonu del monte, plantios d’ocalitos, retayos nel cuerpu de bomberos, intereses económicos y falta de xixilancia de pirómanos.

La mayoría de los incendios entamen depués de les 6 de la tardi ya en fin de selmana, xusto cuando menos efeutivos d’estinción hai en serviciu; ocalitos ya pinos (esta cabera una especie direutamente pirófaga) aumenten el riesgu d’incendios y espardenlos con velocidá, pero el “Principado” sigui ampliando los permisos pa llantalos; la llimpieza de los montes de magar l’abandonu de les fasteres rurales ye insuficiente ya’l fechu de que les lleis permitan facer negociu cola maera quemao y recalificar suelos tres de los incendios pa edificar no que yeren fasteres forestales faen rentables les quemes.

El resultáu, otru añu de llaceria:1.523 quemes qu’afeutaron a 14.470 hectárees, fasta 147 fueos amburando al tiempu. Güei mesmo, lloviendo en cuasi toa Asturies, namás 5 conceyos tienen baxu índiz de riesgu d’incendiu y 48 tan marcaos comu riesgu altu na páxina del 112; Va una selmana ocho conceyos figuraben n’alerta másima de riesgu d’incendiu.

Nuria Prendes

This work is licensed under a Creative Commons Attribution 4.0 International License.