Andecha Astur valora’l papel d’Asturies nel nuéu gobiernu

11 Xineru, 2020

P’Andecha Astur Asturies ta quedando al marxe y perdiendo posibilidaes de condicionar la rialidá política del Estáu, siendo utilizada comu un pión d’intereses ayenos

Na so valoración Andecha Astur apellida de “segunda transición” a esti intre políticu nel que, cola realidá política marcada por un avance del sentimientu soberanista, España torna a presllar files col nueu frente políticu llideráu pol PSOE col que, a cambiu de dalguna cesión mínima nel conflictu de clas, nun van ceder ná importante nel conflictu de soberanía que l’Estáu español caltién coles naciones sometíes.

El documentu critica con dureza la primer “Transición”, de la que diz “cuandu, a la muerte’l dictaor facista (1975), les fuercies españoliegues (de dreches y d’esquierdes) aprofitaron la so superioridá pa llantar a les clases populares y a les naciones sometíes pol Estáu unos primeros pautos políticos” y compara la situación actual con esi intre, nel sen de la reación ante’l xorrecimientu del sentimientu soberanista, que fae pelligrar los intereses económicos de la burguesía y l’autoridá identitaria y política del Estáu español, y del enfotu puestu poles fuercies españoles n’afitar la xunidá perriba de cualisquier otra consideración, tando preparaos pa, en cuantes seya mester, convocar nuees elleiciones enantes de tener que facer grandes concesiones nel imperiu xeneral de la españolidá.

P’Andecha, la necesidá de cuntar con EH Bildu ya ERC son los únicos puntos “febles” d’esti gobiernu español, polo qu’Euskalherria y Catalunya tán meyorando sensitiblemente la so capacidá pa condicionar la rialidá política del Estáu, entantu que los partíos españoles tán dexando a Asturies dafechamente al marxe del procesu, utilizándola comu un pión sometíu y útil pa los sos intereses. La bochornosa intervención de FORO, única fuercia teóricamente asturiana, augura los piores presaxos pa la representación d’Asturies nel gobiernu.

Como conclusión, denuncien el papel decisivu del PSOE na llaceriosa situación na que s’alcuentra Asturies en tolos ámbetos y llamen de nueu a ’aniciar un frente ampliu del soberanismu / asturianismu, “una opción na que naide nun tenga de diluyise ente naide, onde toos aconceyemos pa xuntar enerxíes na defensa de tres puntos mínimos irrenunciables pal futuru d’Asturies: superación del Estatutu impuestu, Oficialidá de la llingua asturianay acabu d’agresiones del Reinu d’España pa con Asturies.