Con namás un añu de trayeutoria tres d’ellos el grupu Fontoria entra nos nominaos de los AMAS na estaya de meyor canción folk

El canciu, dedicáu pol cantante y compositor al so pa, forma parte del so primer discu “Nordés”, un ambiciosu proyeutu nel que quixeron salise un pocu de lo que la xente tien en mente cuando fala de folk, pero ensin dexar de lláu los raigaños “Ye un folk más progresivu, que deriva en casi unes estructures istrumentales de rock sinfónicu y neoclasicismu” declaraba Maxi Areñes na entrevista fecha por InfoAsturies por mor de la recoyida de robles pola República Asturiana na que la so música foi protagonista. Pocu podíen camentar entós, a piques de presentar el so primer trabayu, que’n tan pocu plazu diben tar falando de premios de la emportancia de los AMAS.

Fontoria entamó comu idega nel 2017, pero nun foi fasta l’añu pasáu que sacaron el so primer discu. Anguañu compónenla Xose Anxel Allende, cola gaita y percusión, Rita María Alvarez al vigulín, Pablo pumarada al bodram y Maxi Areñes a guitarres y voz, seique pa conciertos más “grandes” collaboren con otros músicos.

El discu tien influyencies de dellos países que comparten raigañu musical con Asturies, comu ye la Bretaña, ya d’otros más allonxaos culturalmente, comu’l Piamonte, tou ello afilvanao cola más pura tradición asturiana, ufriendo a traviés de la so obra un viaxe musical pel mundiu dende la perspeutiva asturiana.

Que  “Canciu a mio pa” seya definitivamente escoyía comu ganadora na estaya de meyor canción folk del añu depende de los votos populares, que se recueyen na web oficial de los premios dica’l ún de Febreru.

Nuria Prendes

This work is licensed under a Creative Commons Attribution 4.0 International License.