Iniciativa pol Asturianu entama la ochava votación popular pa escoyer la Meyor noticia pal asturianu del añu

El presidente d’Iniciativa pol Asturianu, Llera comentó que “con esta campaña pretendemos facer llegar a los asturianos y a les asturianes delles bones noticies pal nuesu idioma; cada añu que pasa va medrando’l númberu de participantes y la cantidá de noticies positives pal idioma. Tamién val pa facer un repás a tola llabor d’Iniciativa pol Asturianu y pa comprobar como añu a añu la llingua asturiana tien una repercusión postivia nos medios. Esti añu vimos como l’asturianu tuvo presente nun actu del Instituto Cervantes en París, apaeció’l primer xuegu de rol n’asturianu o l’aprobación del decretu pa les prebes d’asturianu nel Marcu Européu de Referencia pa les Llingües”.

L’aniciativa, que s’estrenó nel añu 2013, escueye cada añu por votación popular la noticia más favoratible pa la llingua del añu anterior, tratando d’echar una güeyada optimista sobre l’avance de los drechos pa los asturfalantes. Esti añu, pesi a tolos ataques carecios dende estremaes istituciones y personalidaes, les posibles meyores noticies escoyíes por IPA sumen na menos que dieciochu, pente les que los votantes tendrán que descartar diez, dando’l so votu a les ocho restantes.

Les noticies suxeríes abarquen estremaes cuestiones, dende toponimia a xuegos de rol, canales de Youtube, repercusión internacional del asturianu o presencia nes istituciones. Delles de les noticies almiten más d’una interpretación, considerando bona noticia que’l presidente del “Principado” dexare les sos  promeses de defensa de la llingua en dos menutos escasos d’intervención n’asturianu nel su discursu o que la hestórica del PSOE Berta Piñán, a la que nin siquiera dexaron falar asturianu nel desendolcu del so llabor, entrare al frente d’una nueva Conseyería de Cultura col epígrafe Política Llingüística.

La votación entamó’l vienres 3 de xineru y va acabar el domingu 12 d’esti mes. 

Redaición InfoAsturies

This work is licensed under a Creative Commons Attribution 4.0 International License.