Col casu del octoxenariu alcontráu nel trasteru foron siete les persones mayores alcontraes nel 2019 tiempu depués de la so muerte ensin que naide diere avisu de la so desapaición

Un home d’unos ochenta años apaez muertu nun trasteru, solu, escaecíu, esfrecíu, comu un más de los trastos abandonaos que s’apinen en cuartos mínimos cuando ya nun sabemos que facer con ellos. Pasó en Xixón, baxo los 560.000 euros en lluces de collores que pagó’l Conceyu pa facer rellumar “l’espíritu navidiegu”.

De les circustancies del fináu nun trascendió -por agora- a prensa más datos que la so edá y la so precaria situación económica, que foi la que lu forzó a dexar el so llar y treslladar la so residencia a los trasteros. Llevaba meses viviendo allí ensin que se tomare dala midía pa meyorar la so situación, pero naide lu echó en falta fasta que’l fedor de la descomposicion alertó a los vecinos.

N’Asturies viven solos más de 64.000 persones mayores de 65 años, munches con pagues que nun algamen los 600 euros, abondes tamién con problemes físicos y mentales; los hospitales alerten del espoxigue del númberu de pacientes d’avanzada edá que, tando enfermos, nun tienen quien curie d’ellos. Les sos families en munchos casos viven a miles de kilometros, emigraos, y dengún plan garantiza la so atención nin los protexe de desfiucios.

Llucía F. Marqués

This work is licensed under a Creative Commons Attribution 4.0 International License.