Cola no aplicación de los proyeutos de reactivación de les cuenques mineres y los 98 millones d’euros prometios en mayu ensin invertise culmínase’l procesu de desaniciu de dos de los focos económicos ya hestoricamente revindicativos d’Asturies

En Mayu, a pocos díes de les elleiciones, les promeses renovaes aseguraben 98 millones  pal Nalón y el Caudal, colos que se pondríen en marcha -con bultable retrasu- los proyeutos del plan 2013-2018, de los que cuarenta desendolcaríense en diez conceyos de la cuenca minera asturiana, colo que’l conseyeru d’industria afirmaba “tener fecho un esfuerciu pa mitigar el preslle mineru”.

El fechu ye que, a un añu de la implantación pola fuercia de la renomada “descarbonización”, colos puertos apinaos de carbón foriatu y la contaminación del aire calteniendo’l nivel d’alerta costante, nin se frenó la polución que valió d’esculpia pa presllar les mines nin se punxeron en marcha los planes de reactivación prometios; los cacarexaos proyeutos de restauración ambiental, qu’iguarien los daños de la minería y darien emplegu nun s’aniciaron, nin siquiera se desendolcaron los proyeutos pa xenerar texíu económicu alternativu incluyíos nel alcuerdu marcu 2013.2018.

La transición enerxética -talo que’l restu les “reconversiones”- resultó ser una transición a la nada. Los trabayaores que nun s’acoyeron al pan pa güei y fame pa mañana qu’impliquen les prexubilaciones y les baxes voluntaries tan finando’l paru y les cuenques son un ermu llaboral nel que malpenes sobrevive dalguna empresa ganaera. El restu van finando pali que pali, faltos del motor económicu de la minería. Entantu el presidente, Barbón, qu’anantes de les elleiciones prometió a los trabayaores un aconceyamientu pa estudiar la so situación, nin ta, nin se-y espera.

This work is licensed under a Creative Commons Attribution 4.0 International License.