“Ausencia total de control internu”. Asina define la Sindicatura de Cuentes la xestión de les sovenciones nominatives concedies de magar el 2016 por parte de la mitá de les conseyeríes de l’alministración.
Sovenciones nominatives ye comu se llamen a les otorgaes direutamente, ensin pasar por un procesu previu de concurrencia, ello ye, les concedíes a deu. Namás nel 2017 fueron a parar a estes ayudes direutes cerca de 46 millones d’euros, y otru tantu nes que foron prorrogaes ensin auditoría nin concursu nel añu 2018, ello ye, queda probada la esistencia d’una intensa rede clientelar de la que se beneficien los allegaos al gobiernín.
L’incumplimientu reiteráu de la obligación d’auditoría durante los caberos años ye especialmente acusáu nes conseyeríes de Facienda y Seutor Públicu, Desendolcu Rural y Recursos Naturales ya Infracadarmes, Ordenación del Territoriu y Mediu Ambiente: estes conseyeríes nun recueyen nos sos planes estratéxicos de sovenciones denguna mención a les nominatives, lo que, comu alvierten dende la Sindicatura, podría obligar a la devolución de les mesmes por parte de los beneficiarios.
Amás d’ello, l’informe recueye una bona riestra de “incorreciones” contables, comu nun remitir a la sindicatura la obligatoria información en materia de contratación o remitila incompleta, contabilizar comu ingresos los 166 millones d’euros qu’adeuda l’estáu de los fondos mineros, presentar memories incorreches que nun s’axusten a la cadarma desixida pol Plan Xeneral de Contabilidá o nun acreditase’l seguimientu de la execución de los contratos.
Llucía F. Marqués
This work is licensed under a Creative Commons Attribution 4.0 International License.
