Siete candidatures apuéstense’l dudosu honor de recibir el premiu otorgáu a aquella que más dañu fixera al mediu natural asturianu. Prevese qu’esti añu -mesmo que los anteriores- tea bien reñíu.

La Coordinadora Ecoloxista d’Asturies convoca la 27 edición de la Bullada de Purpurina, un galardón que reconoz el llabor y acciones d’empreses, instituciones y alministraciones qu’al so xuiciu destacáron más nel so llabor contra la naturaleza y el mediu ambiente asturianu.

El pasáu añu otorgóse polos sos numberosos méritos al Vice-Conseyeru de Mediu Ambiente’l señor Benignu Fernández Fano, pola so demostrada incapacidá y la so falta de sensibilidá ambiental nel desendolcu’l so puestu.

Nel 2019 abonden los as candidatos-as propuestos, ente los que se realizó una interesante peñera d’alcuerdu a los sos méritos:

-La Conseyera de la Presidencia Rita Camblor Rodríguez, por ser la responsable de que’l Gobiernu de Asturies venga refugando de forma repitida’l drechu d’accesu a la Xusticia de baldre a les asociaciones ambientales.

-Al Conceyu de Sieru pola riestra de problemes ambientales y la so actitú negativa pa resolvelos, cola autorización d’un nuevu crematoriu na Pola, l’autorización del circuitu de motocross de Valdesoto, el nun tomar midíes pa desaniciar la contaminación del aire…

-Al Conseyeru de Desendolcu Rural, Agroganadería y Pesca, el señor Alejandro Calvo Rodríguez pol so defensa de los ocalitos y la so esbarriada propuesta de llantar 10.000 hectárees más, por siguir coles matances de mabees y de llobos, siguir cola pesca con muerte pa los salmones ensin restrición, etc.

-A l’asociación d’empresarios de Aridos d’Asturies, que les sos canteres incumplen toles normes ambientales énte la pasividá del “Principado”, a lo qu’hai que sumar la so intención d’abrir dos tales plantes d’asfaltu nes canteres de Caldes y Gráu.

-A la papelera Ence por siguir enllenáu’l país de ocalitos, primiendo pa consiguir que se llánte’l nintens y ampliando la so factoría de Navia.

– A Arcelor pol altu grau de contaminación del aire, agua y suelu que sigue produciendo mientres anuncia reformes que nunga lleguen a poner en práctica.

-A Hunosa por querer camudar la térmica de la Pereda nuna incineradora de borrafes col consiguiente impautu de la contaminación polos procesos d’incineración de basories en forma de combustible sólidos.

El xuráu va decidir la próxima selmana cuál de toos estos candidatos ye’l más sobresaliente. Anque’l premiu nun ye nenguna chancia apúrrese simbólicamente el 28 d’avientu.

Redaición InfoAsturies

This work is licensed under a Creative Commons Attribution 4.0 International License.