Nun mercar nos dies de fuelga ye la meyor manera de sofitar a aquellos que lluchen polos sos drechos llaborales

Bono, pos el sábadu vamos dir a la fuelga, porque somos unes lloques del coño (falo en femenín porque la mayoría somos muyeres), porque queremos daqué tan desproporcionao como cobrar 14000€/añu, porque esto de l’antigüedá que nun seya namás cumplir años y que te unvien una tarta, porque esos 20 minutos p’almorzar o merendar son una puta mierda y más si nun computen como tiempu de trabayu efeutivu y ventílennos 2 hores a la selmana, asina porque sí, caru café ente tener que pagalo y currar más por él.

Porque esisten persones que lleven 12-15 años encadenando contratos temporales y con categoríes d’aiudante de dependiente cuando yá tendríen de ser direutores xenerales pol tiempu, esfuerciu y valía. Por toes estes llocures y dalguna más, como que si te coincide un festivu mientres les tos vacaciones nun lu pierdas dientro d’elles… de los festivos y la so recuperación posterior podría dar yo una máster class pero, en fin…eso pa la prósima .
Yá sé que son pidimientos pa siguir nun putu sistema que nos esclaviza, que fai que pasemos más tiempu nel curru qu’al pie de los que queremos tar, que producimos pa qu’otros engorden les sos barrigues y cuentes corrientes, mientres nun llegamos a fin de mes.

Selo, pero montémelo mal, montémosnoslo mal y agora nun pueo mandalo tou a tomar pol culu, porque decidí tener dos fíos y nun m’arrepiento nin un segundu de la mio vida. Asina que por ellos y porque nun pueo echar marcha tras y correr ye de cobardes, voi facelo pero palantre.
Namás te pido una cosa y ye que si nos entiendes y sofites…nun vaigas mercar los díes de fuelga. Ente toos podemos, xuníos somos más fuertes, somos probes pero, somos MEYORES!!!. Arguyosa de pertenecer al bandu al que pertenezo.

Mar G. Fernández

This work is licensed under a Creative Commons Attribution 4.0 International License.