Ser de los que más lleen del estáu nun torga que se presllen les biblioteques n’Asturies

Acordies los caberos datos apurrios pol Ministeriu d’Educación, Cultura y Esporte, ente’l 2016 ya’l 2018 presllaron 29 biblioteques n’Asturies, la práutica totalidá en fasteres rurales. Nun ye por falta d’usu: la media de ciudadanos qu’acuden a les biblioteques ye del 62%, superando a la media estatal en 15’3 puntos. Les visites a la biblioteca non solo nun amenorguen, sinon que medren respeutu a años anteriores. De fechu, Asturies ye’l territoriu con mayor índiz d’usuarios iscritos a dalguna biblioteca.

El preslle d’una biblioteca ye difícil de desplicar. El preslle d’una biblioteca que s’utiliza ye indesplicable. Les biblioteques públiques cumplen un serviciu fundamental p’averar la llectura a toos aquellos que nun pueden permitise mercar tolos llibros que quisieren, pero non solo eso: son llugares nos que se desendolquen actividaes culturales, cientros d’interné, llugares d’estudiu y lletura de prensa, puntos d’animación llectora a la reciella… cumplen un llabor social indispensable, si lo que se quier ye una sociedá culta ya informada.

Comu dixo l’escritor inglés Allan Pullman ante’l preslle de les biblioteques públiques propuestu por David Cameron, va 8 años “Ye una triba de pérdida interno, d’escurecimientu de les coses, un estrechamientu de los horizontes que gradualmente mos convertirá en menos cultos, menos intelixentes, menos coscientes, menos útiles, menos imaxinativos y menos bona xente de lo podríemos ser”.

Nuria Prendes

This work is licensed under a Creative Commons Attribution 4.0 International License.