InfoAsturies súmase a la campaña entamada dende dellos coleutivos afalando a brindar con Sidre Asturiano nestes fiestes navidiegues. Por tradición, por sofitar lo propio y porque ta perbono: Sidre d’Asturies

Pasando perriba la publicidá que mos vende’l xampán francés, el cava catalán o el vinu español, esti añu proponemosvos acompangar les cenes familiares, de collacios o d’empresa, con sidre. Y non solo pa los culinos en chigre anantes de la fartura: la bayurosa gama d’opciones que la sidre asturiana ufre anguañu permite entamar col vermú (sidreru) pela mañana, acompangar l’aperitivu con una sidre de xelu o de fuéu -dos de les opciones más nueves y sosprendentes pa tomar la sidre-  tomar sidre coles avezaes fartures-de la tradicional o la de Nueva espresión, pa los que’n casa nun quieran echalo por nun chiscar- brindar con sidre brut o esplumosa y si entá queden ganes, rematar con un pigazu d’auguardiente o de llicor de sidre.

Pa los que nun conozan toes estes variedaes, recomendamos visitar tiendes especializaes y participar na campaña promocional de la DOP “Navidaes daveres” que durará dica Reis y na que  324 establecimientos -incluyendo chigres, supermercaos y tiendes- permitirán prebar dalgunes de les meyores sidres brut d’Asturies.

This work is licensed under a Creative Commons Attribution 4.0 International License.