Llucía F. Marqués

Ca vegá son más los asturianos y asturianes que viven solos -y muerren solos- y ye preciso facer por ellos daqué más que convidalos a cenar

Cabanaquinta súmase a los conceyos que, comu’l d’Ayande o Cuideiru, ufren una cena especial peles fiestes navidiegues a les persones mayores que viven soles.

La aniciativa, de man, ye bona. Cuantu meyor xuntos cola xente del conceyu esfrutando un bon menú que solos en casa cenando lo qu’algame cola correspondiente pensión frente a la tele. La llectura más xeneral d’esta noticia ye “a ver si se fae en tolos conceyos”. Sicasí, nun podemos paranos ehí, remendando díes sueltos ya ensin enfrentar el problema.

La necesidá d’estes cenes retrata una realidá que nun puede ser definía sinón comu triesti: ca vegada son más los asturianos que viven solos y, de pasu, los que muerren solos, ensin que naide se decate (seies foron alcontraos esti añu tiempu depués de la so muerte). Más de 137.000 asturianos nun comparten vivienda y d’ellos más de 64.000 superen los 65 años. Danse casos comu’l conceyu de Ponga, nel que tolos vecinos que viven solos sumen el 15% de la población, siendo toos ellos xubilaos.

La mayoría d’estes persones viven en fasteres rurales, ensin la correcha atención mélica, ensin tresporte en condiciones, en munchos casos incluso ensin carreteres afayaices. Son mayores que, amás, ante la falta de relevu xeneracional asumen los trabayos que tendría de facer una mocedá ausente, entantu ven cayer y desapaecer el país nel que vivieron. Los problemes mentales derivaos tantu de la edá comu de la solitú son avezaos.

Nel orixe d’esti problema, ta l’Asturies abandonada, la emigración de los familiares -ya seya a otru país o a fasteres urbanes- agravada pola falta de vecinos y l’avieyamientu de los mesmos. Un par de cenes navidiegues, tan bien, pero nun dexa de ser una tirita mal puesta nun tayu pel que mos desangramos.

Llucía F. Marqués

This work is licensed under a Creative Commons Attribution 4.0 International License.