Asturies pol Clima convoca comu movilización cientral un manifestamientu n’Avilés, el vienres 13 d’Avientu a les 19 hores, con salida na Plaza les Meanes
De magar la Cume Social de Madrid, na que participaron Asturies pol Clima y dellos otros coleutivos asturianos, plantegóse una convocatoria común que coincidiere col final de la COP25, col envís d’esparder un mensaxe necesariamente críticu respeutu a los sos resultaos y alcuerdos que, dende’l puntu de vista d’ApC van tar perlloñe de los compromisos indispensables p’abordar con un mínimu d’efeutividá la situación d’emerxencia climática “Los gobiernos vuelven inorar irresponsablemente la realidá y les reclamaciones d’una mayoría social, tal y como s’espresó nel multitudinariu manifestamientu del pasáu vienres 6A onde tuvimos presentes como Pautu Social”.
Con esti manifestamientu pretenden denunciar lo que consideren una hipocresía por parte de los gobiernos y grandes axentes económicos que “píntense de verdi ensin comprometese realmente nos sos respeutivos ámbetos”. Pa ApC ye insultante la publicidá istitucional y corporativa de los que nun respuenden políticamente o se beneficien económicamete d’un modelu incaltenible ya en crisis.
Poro, afalen a actuar darréu, dende les alministraciones autonómiques y municipales, camudando de mentalidá ya idegues, asumiendo los retos que supón la inevitable transición ecolóxica.
Redaición InfoAsturies
This work is licensed under a Creative Commons Attribution 4.0 International License.
