Solicitarán que l’organismu europeu estudie’l casu y que se suspenda cautelarmente cualisquier sovención al sindicatu mentantu nun s’esclarien les acusaciones

La UCO de la Guardia Civil estimó en más de 1’35 millones d’euros el fraude cometíu pente los años 2010 y 2014, seique sigún la Intervención Xeneral de l’Alministración del Estáu la cifra final pue ser muncho mayor

Depués de la detención en 2015 del secretariu xeneral del sindicatu, Justo Rodríguez Braga, xunto a otros 5 representantes del mesmu, ya’l rexistru del llar sindical, abrióse en Xulgáu 4 d’Uviéu dilixencies contra la UGT, viéndose obligada la Xunta Xeneral a abrir una Comisión d’Investigación nel 2017, dando comu resultáu una “Propuesta de dictame” que decidieron, colos votos del PSOE,PP, IU y Ciudadanos, nun convertir en documentu oficial, restando asina fuercia al asuntu.

Sicasí, esa propuesta afita esplicitamente la esistencia de ñicios d’un posible desvíu de fondos destinaos a la formación pal emplegu, apuntando a la UGT comu cientru d’un entramáu d’empreses pantalla y fondaciones coles qu’elevar la facturación y evitar controles, perxudicando con ello al erariu públicu. Esti informe denuncia tamién la esistencia de práutiques fraudulentes y desvíu
sistemáticu de fondos, apropiándose illegalmente de les sovenciones europees recibíes pa formación pal emplegu.

Una dellegación asturiana viaxará a Bruseles mañana pa presentar ante la OLAF el casu del desvíu de fondos de los cursinos de formación a la UGT. Fadránlo a traviés del grupu europarllamentariu  “Agora Repúbliques”, coallición a la que pertenez Andecha Astur. Con esta denuncia Andecha Astur pretende que la OLAF investigue esti presuntu delitu ensin les inxerencies de los partíos españoles, a los qu’acusen de paecer “un sindicatu’l crime, por tapase mutuamente los delitos”. L’informe que los partíos españoles se ñegaron a aprebar na Xunta Xenral señalaba les responsabilidaes polítiques de tres espresidentes (Javier Fernández, Álvarez Cascos y Álvarez Areces), el segundu d’ellos acusáu agora tamién de cobros indebíos nel so partíu, ya’l  terceru implicáu na sentencia condenatoria del casu Riopedre.
Dao la gravedá del casu, pidirán tamién que se sospenda cautelarmente cualisquier sovención al sindicatu español UGT.

Nuria Prendes

This work is licensed under a Creative Commons Attribution 4.0 International License.