Siete de los trabayos más destacaos de los Premios Fugaz sedrán proyeutaos nel IV Festival de Curtiumetraxes de Gráu. Sedrá na Casa Cultura’l 5 d’Avientu a les 19:30h y la entrada sedrá llibre fasta completar aforu
Esti añu los curtios escoyios son dellos de los galardonaos nos Premios Fugaz, los principales del curtiumetraxe del estáu y los únicos decidios por una gran comisión de profesionales compuesta por más de 400 persones venceyaes al seutor del curtiumetraxe. Na so tercer edición, cellebrada en Mayu del 2019 na Sala 25 de Kinépolis Madrid con más de 1.000 butaques, otorgáronse 18 estatuines que premiaron tolos aspeutos qu’intervienen na creación de un curtiu, amás de dos premios homenaxe que recayeron nes figures de Daniel Sánchez Arévalo y Asunción Balaguer, poles sos carreres profesionales.
Les obres que van proyeutase, que cunten con estrelles como Leonor Watling o Secun de la Rosa y tan dirixies por destacaos profesionales como Toni Bestard o Marta Aledo, sedrán: La Noria, de Carlos Baena, qu’algamó dos premios (meyor curtiumetraxe y meyor banda sonoro) y 4 nominaciones, Flotando, de Frankie de Leonardis, Premiu Fugaz a meyores efeutos visuales y dos nominaciones, La guarida, dirixía por Iago de Soto, que recibió’l premiu a la meyor direición y 10 nominaciones, Ipdentical, de Marco Huertas, Premiu a la meyor direicion d’arte y 6 nominaciones, Seattle, que consiguió’l Premiu Fugaz al meyor guión gracies a la direición de Marta Aledo, amás de 3 nominaciones Mi hermano Juan, codirixía por Cristina Martín y Maria José Martín, meyores direutores noveles y finalmente Background, una obra que dirixe Toni Bestard y que mereció 2 Premios Fugaz -meyor curtiumetraxe y meyor montaxe- y 5 nominaciones.
Redaición InfoAsturies
This work is licensed under a Creative Commons Attribution 4.0 International License.
