Güei a les siete la tardi, na Plaza 6 d’Agostu, los xixoneses amosarán la so refuga al guelpe d’estáu en Bolivia

Les declaraciones de Jeanine anunciando “el fin de los ritos satánicos” y la quema de llibros y señes indíxenes por parte del gobiernu autoproclamáu faen prever una auténtica caza de bruxes al más puru estilu inquisitorial

La renuncia forciada del presidente Evo Morales, del so vicepresidente, Álvaro García Linera, y de tolos funcionarios na llinia de socesión —la presidenta del Senáu, Adriana Salvatierra, ya’l presidente de la Cámara de Diputaos, Víctor Borda— y l’autoproclamación de la racista y ultracatólica Jeanina Añez son la culminación d’un procesu violentu aniciáu meses atras pa finar col gobiernu llexítimu.

La imprescindible collaboración de los medios de comunicación, en manes de la drecha blanco, y del gobiernu de Donald Trump, afalando a la repetición -innecesaria ya insuficiente pa calamar los ánimos- d’elleiciones, llevaron a una situación que sirvió en bandexa l’abandonu d’Evo Morales y la entrada de grupos violentos abiertamente facistes en La Paz, semando terror en tol país, amburando sedes d’organizaciones indíxenes, campesines y sociales y agrediendo a funcionarios y políticos. Tres de tou ello escuéndese la imposibilidá pa la drecha blanca d’aceutar la victoria d’un indíxena.

Los gobiernos d’Evo Morales  meyoraron el PIB de Bolivia comu enxamás na so hestoria, meyorando’l nivel de vida del pueblu Bolivianu, respetando les cultures orixinaries, poniendo la educación y la vivienda al algame de toos y finando con sieglos de fame y discriminación. Punxo, en resume, a los indios al altor de la minoría blanca, que nun pudieron consentir que los “cholos” tuvieren les sos mesmes posibilidaes.

La concentración conderga dafechu a “los golpistes y los sos cómplices nacionales e internacionales qu’atacaron a homes y muyeres humildes, violentándolos na so integridá física y mental, con persecución al movimientu indíxena y al pueblu en xeneral movilizáu a favor del procesu de cambiu, con tortures a es- representantes del gobiernu de Morales, con manifestaciones racistes abominables, incendiu de casas, menacies y hostigamientu a familiares de persones del gobiernu”.

This work is licensed under a Creative Commons Attribution 4.0 International License.