Depués de presllar les sos esplotaciones mineres n’Asturies, la hullera precisa del carbón foriatu pa caltener la cientral térmica de La Pereda ya’l Llavaeru Batán, polo menos dica’l 2021

Tres del preslle, a finales del añu pasáu, de los pozos de Carrio (Llaviana) y Santiago (Ayer), namás el Pozu Nicolasa y la escombrera de Figaréu caltienen daqué d’actividá estractora, insuficiente pa cubrir la demanda de la propia empresa.

La plataforma de contratación del estáu espublizó la pasada selmana l’anuncia de llicitación pa l’alquisición de mineral por un valor total d’entre 23 y 30 millones d’euros repartios en dos años. 222.000 tonelaes ye lo que Hunosa requier pa caltener n’activu el Llavaeru Batán, nel qu’entá trabayen unes 80 persones, y la térmica de La Pereda (Mieres) los dos prósimos años. El mineral aportará dende mines allugaes en países en víes de desendolcu nos que nun se garanticen los drechos llaborales de los mineros nin se tien pricuru pa col dañu ambiental.

Llucía F. Marqués

This work is licensed under a Creative Commons Attribution 4.0 International License.