972.578  asturianos escoyerán güei pente doce partios, un asturianu y once españoles, pa que los representen nel gobiernu estatal

Nos terceros comicios no que va d’añu Asturies perdió cerca de 2000 elleutores: el censu elleutoral güei ye de 972.578 persones, de les que alrodiu de 250.000 viven nel estranxeru. Les que viven n’Asturies podrán votar nun de los 606 colexos elleutorales repartios pel país. Nes anteriores votaciones, les d’abril y mayu d’esti mesmu añu, l’amenorgamientu del censu en más de 8000 votantes ya ficiere a Asturies perder un escañu nel Congresu, quedando con 7, lloñe de los diez colos que cuntaba nes primeres elleiciones “democrátiques”.

El descensu d’elleutores xúnese al previsible amenorgamientu de la participación nestes elleiciones, marcaes pol fartazgu de la población y la desconfianza na istitución mesma del gobiernu español, y a les dificultaes de los asturianos emigraos pa votar, ya que a los avezaos pilancos súmense los derivaos de los curtios plazos manexaos nestes elleiciones.

This work is licensed under a Creative Commons Attribution 4.0 International License.