Nel mes de setienbre Asturies rexistró la mayor cayía n’afiliación a la Seguridá Social en 15 años, con 6.469 cotizantes menos y un espoxigue del paru del 3’17%, al tiempu que la rotación llaboral rozaba’l 100% de les contrataciones
Pente Xineru y Setiembre del 2019 robláronse n’Asturies 283.691 contratos, de los que namás 20.820 foron indefinios y de los temporales, superando’l mediu añu namás 4.253 y siendo más de la metá -140.958- de duración menor al mes.
En porcentaxes, no que va d’añu, cerca’l 93% de los contratos roblaos foron de calter temporal, el 53% d’ellos con una duración de menos d’un mes y más del 7% del total con menos d’una selmana. La mayoría de los emplegaos concatenen dellos contratos, dándose’l casu de trabayadores que sumen decenes d’ellos nun mesmu añu, algamándose cotes de rotación llaboral y precariedá ensin precedentes. Nesta situación, la persona vese forciada a buscar activamente emplegu al mesmu tiempu que trabaya o a arriesgase a quedar en paru una y otra vegada, coles consecuencies sicolóxiques y económiques qu’esta inestabilidá implica.
Los datos son del ServicioPúblico de Empleo Estatal (Sepe) y espeyen una fuerte tendencia por parte de los contratantes a recurrir a a modalidá de contratu por obra y serviciu, que flesibiliza al másimu la rellación llaboral, pudiendo referise a un díi o a tres años. Otros de los contratos englobaos nesta temporalidá son los d’interinidá, los eventuales y los de discapacidá.
Llucía F. Marqués
This work is licensed under a Creative Commons Attribution 4.0 International License.
