No que cinca a emplegu, l’estudiu presentáu pol Oservatoriu rexonal del BBVA  confirma l’enclín negativu espeyáu na EPA (Encuesta de Población Activa) de los caberos trimestres. Si l’añu pasáu Asturies perdió’l 0’9% de los sos puestos de trabayu, a lo llargo del añu en cursu prevése una perda de cuasi el duple, 1’6% emplegaos menos que nel 2018, un total del 2’5% menos en namás dos años.

La industria ye’l seutor que más puestos perdió na cabera década, 22.600, 2.000 d’ellos namás l’añu pasáu, y siguirá siendo el más perxudicáu tamién nel 2019. L’agricultura y ganadería ya nun pierden emplegos al mesmu ritmu, cenciellamente’l desaniciu ye tan grande que nun queden tantos puestos que perder, entantu que nel seutor servicios destaca la rotación llaboral y la precarización de los emplegos esistentes.

L’otru indicador de la situación económica del país tampocu ye positivu, el xorrecimientu del PIB sedrá mui perbaxo del correspondiente al añu pasáu ya inferior al del estáu, con namás un 1’7%.

Sicasí, les polítiques sociales y económiques, tantu del “Principado” comu del gobiernu d’España sobre Asturies, nun planteguen dengún cambeu sostancial nes sos estratexes que permita albidrar un xiru na situación o, cuandu menos, un frenu al desaniciu.

Nuria Prendes