El 5 de Payares presentaráse oficialmente l’Asociación d’Amigos del Muséu de Belles Artes d’Asturies, ñacía col envís de sofitar y esparder tolo venceyao a esta istitución
Los oríxenes del Muséu de Belles Artes d’Asturies remóntense a la costitución, nel añu 1969, de la Fundación Pública “Cientru Provincial de Belles Artes”,seique la pinacoteca nun se naguraría dica’l 19 de Mayu del 1980, cuntando entos con siete sales nes que s’esponien un total de 78 obres. Cuasi 40 años depués, cuenta con una impresionante coleición de más de 15.000 pieces de los sieglos XIV al XXI, incluyendo obres de El Greco, Zurbarán, Ribera, Murillo, Carreño de Miranda, Goya, Miguel Jacinto y Luis Meléndez, Sorolla, Piñole, Valle, Aurelio Suárez, Luis Fernández, Picasso, Dalí, Miró, Tàpies y Barceló.
Esti añu cuntará, por fin, amás con una Asociación d’Amigos que sofiten el muséu y les actividaes que d’elli dependan. L’asociación presentaráse al públicu el martes 5 Payares pa informar de los sos fines, resumir los sos estatutos y convidar a toles persones ya istituciones que quieran sumase a la mesma comu socios a que lo faigan.
This work is licensed under a Creative Commons Attribution 4.0 International License.
