Pa los organizadores del actu, Nora Antifa y Darréu, ye ca vegada más necesario caltener la memoria vivo y desconfien de les istituciones continuadores del franquismu, sabiendo que tendrá que ser el pueblu asturianu cosciente quien caltenga encesa la lluz de l’alcordanza y la llucha
Un añu más l’alcordanza y reivindicación aconceyó a decenes de persones nel Cimenteriu de Carbayín col envís de rindir homenaxe a los 24 homes que fueron asesinaos depués de la ofensiva que los trabayaores de la cuenca del Nalón llevaron a cabu nos primeros díes de la revolución
Que nun se mos escaezan los sos nomes. La nueche del 24 d’ochobre sacáronolos de la cárcele de Ciañu, yeren Benjamín García, Agustín Amil, Melquíades Álvarez, José Meana, Laurentino Meana, Eloy Vallina, Honorio Vallina, Faustino Freigedo, Gumersindo Díaz, Tomás Centeno, Manuel Fernández, José María Vega, Cándido Díaz, Alejandro García, Ángel Vallina, Celso Rodríguez, Ernesto Pérez, Alejandro González, Dimas Yáñez, Antero Valdés, Gerardo Noriega, Antonio Flórez, Ernesto Vázquez, José Montes y Laudelino García. Foron executaos en mitá de la nueche y vinieron a sumase a los más de 1.200 muertos rexistraos demientres la Revolución d’Ochobre,- frente a los escasamente 300 pente militares, guardies civiles y guardies d’asaltu- entamando la llarga llista d’asesinaos na xabaz represión posterior a la Revolución d’Ochobre.
Nel actu punxeron enfotu na necesidá na Asturies de güei de la llucha “por un futuru nel que seya’l pueblu trabayador asturianu el que tenga capacidá de decidir por sí y pa sí. Dende Darréu paeznos qu’ello pasa necesariamente por frayar col estáu de les coses, pola superación del sistema capitalista, y por una Asturies na que seya la clase trabayadora la que tenga’l poder, y polo tanto les ferramientes pa que llaceries como’l facismu, el machismu, el racismu, la homofobia, la xenofobia… nun tengan cabida. Como suel dicise, el meyor homenaxe que-y podemos facer a los Mártires de Carbayín, ye caltener la so llucha encesa, ye siguir puxando por una Asturies del pueblu trabayador, y pal pueblu trabayador”
Tamién pidieron que nun s’escaeza que “esi poder capitalista, eses élites socioeconómiques, siguen siendo les mesmes que nos reprimíeron nos gobiernos drechistes de la II República Española, o durante’l franquismu”.
Llucía F. Marqués
This work is licensed under a Creative Commons Attribution 4.0 International License.
