Durante la charla organizada por Nora Antifa en el Llar el Mataderu, la contundencia de los datos apurríos por Mariano Suárez, afilvanando presente y pasáu, debuxó con claridá les tosques maniobres de los españoles pa remanar al so gustu una hestoria que nun-yos pertenez. Na so intervención espeyó nidiamente cómu l’Estáu español remana les realidaes y fechos d’Ochobre del 34 pa intentar desvistilu del calter de rempuesta obrera revolucionaria nel ámbetu nacional asturianu
Tratóse igualmente de cómu se perfae por presentar esi Ochobre comu si fore una especie de revuelta de mineros necesitaos, tapeciendo que se trató d’un conflictu ente realidaes nacionales estremaes, de la rempuesta del Pueblu Asturianu escontra l’Estáu español. Y tamién s’analizó cómu se suel dar a entender que se trató d’un españíu social que surdió de sópitu, cuandu en realidá, comu quedó demostrao na so esposición, foi una revolución que se llevaba planificando dende munchos años anantes, cuasi de magar 1917.
La Revolución d’Ochobre del 34 supunxo pal pueblu trabayaor asturianu un llargu y meticulosu esfuerciu de planificación organizativa, política y militar. Sólo asina foi posible que naquellos díes ente 30.000 y 50.000 asturianes y asturianos armaos defendieren un oxetivu común y claru: llibrase d’España, poniendo en marcha darréu un nueu modelu social sofitáu nuna Asturies socialista y soberana. El movimientu obreru asturianu tenía entós percomprobao que nun podía aspirar a vivir llibre y dinamente si Asturies siguía sometía a la monarquía española, o a una dictaúra militar comu la de Primo Rivera, o a una república española comu la Segunda. Poro, apostó por facer soberanu al Pueblu Asturianu y asumió Asturies comu marcu específicu d’actuación. De fechu, comu remembró, nesos díes nació la que se nomaría República Independiente d’Obreros y Campesinos d’Asturies, proclamá poles bases obreres, al marxe de les organizaciones polítiques españoles, y defendía pol Tercer Comité Revolucionariu, que presidió Berlarmino Tomás.
Tamién se faló de comu’l PSOE trató de remanar entós y agora’l papel que tuvó nesta revolución, cuando en realidá foron los primeros n’abandonar el Primer Comité Revolucionariu de l’Allianza Obrera d’Asturies. Y de cómu entamó’l PCE un Segundu Comité Revolucionariu, qu’ellos mesmos disolvieron a les 24 hores. Siendo, a lo cabero, el Tercer Comité Revolucionariu’l qu’apostó con decisión pola revolución y, al acabu, por una negociación digna ente Asturies y España, que se desendolcó d’igual a igual. Polo que se reconoz al presidente Belarmino Tomás, xunto col Pueblu Asturianu, comu braeru protagonista d’esta hestoria.
Redaición InfoAsturies
This work is licensed under a Creative Commons Attribution 4.0 International License.
