Pente güei y mañana 3 actos remembrarán l’ochenta y cincu aniversariu de la Revolución d’Ochobre: Güei nel Llar El Mataderu, charra de Mariano Suárez “L’Ochobre qu’España mos quinxo robar” y mañana nos Cimenterios de Pando -tumba de Belarmino Tomás, presidente de la República Asturiana- y de Carbayín -n’honor a los mártires de Carbayín-

5 d’Ochobre de 1934: La fuelga xeneral convocada en cuasi tol Estáu fina aina nel restu los territorios, pero n’Asturies  miles de muyeres y homes  ñéguense a tornar ensin más pa casa y decidien continuar na llucha pa llibráse del xugu al que la dictadura española los sometía, pa finar cola  precaria situación política, económica y social que carecíen, declarando la República Socialista d’Asturies.

Foi l’entamu d’una revolución, xabazmente reprimida pol gobiernu d’España, que dexare cayer tol so pesu represivu enriba’l nuesu pueblu, dexando un saldu de más de 1.200 muertos pente los revolucionarios frente a los 300 pente militares, guardies civiles y guardies d’asaltu. Ensin escaecer la brutal represión posterior, que, sicasí, nun se pue comparar a la qu’hubo tres la Guerra Civil.

Una revolución trunfante y una República Asturiana, aplastada xabazmente pola República española y que tres años dempués declararíase de nueu soberana ya independiente de la mesma.

Nesti 85 aniversariu, como nos anteriores, los homenaxes vendrán del pueblu.

Mañana, 12 d’Ochobre, Andecha Astur convoca comu cada añu el so homenaxe a la Revolución asturiana d’Ochobre del 34, a les 13 h. nel Cimenteriu Pando –Llangréu- , delantre de la tumba d’un de los más emportantes protagonistes de la hestoria asturiana del caberu sieglu, Belarmino Tomás. Ellí tendrá llugar la ufrienda floral cola qu’añalmente se rinde homenaxe a a República Obrera y Campesina d’Asturies, declarada n’Ochobre del 34,  y al Pueblu Asturianu “que protagonizó la hestórica revolución y que la defendió cola vida frente al exércitu de la República Española”.

Pocu anantes, a les 12, los Mártires de Carbayín sedrán remembraos nel cimenteriu de Carbayín altu, en Sieru. Ya’l día anantes, esta mesma tardi, Nora Antifa entama una charra a cargu del hestoriador Mariano Suárez, baxo l’entítulu “L’Ochobre qu’España mos quinxo robar”, nel Llar el Mataderu a les 20:00 h.

Redaición InfoAsturies

This work is licensed under a Creative Commons Attribution 4.0 International License.