Dende’l Comité d’Empresa reclamen que toles pallabres d’aliendu y sofitu recibies dende les alministraciones llocales, nacionales, estatales y europees se conviertan en fechos claros y que detengan “esta burla que se ta faciendo dende Vesuvius a tola sociedá asturiana, colos trabayadores comu principales víctimes”

El plantón de la empresa al conceyu nel que se diben buscar soluciones estremaes al despidu coleutivu, finó cola paciencia de los trabayadores, que decidieron, pente otres midies vindicatives, empresllase na Catedral d’Uvieu dica que se yos ufra una solución al conflictu.

“Asturies nun puede consentir tener que facer la reindustrialización de la reindustrialización polos caprichos ya intereses d’una multinacional” declaró’l presidente del comité d’empresa, Juan Manuel Suárez Baragaño, faciendo alusión a les continues “reconversiones” qu’Asturies vien careciendo y que tuvieron siempres comu consecuencia la perda d’emplegos ensin contrapartida rial.

Ayeri a les siete y media una multitudinaria concentración acompangó a los empresllaos nel esterior de la Catedral p’amosayos nuevamente’l so sofitu. El pueblu asturianu vuélcase nesti conflictu, comu ya fixere anantes con Arcelor, coscientes de que lo que ta en xuegu nun ye namás el mediu de vida d’un cientu de families, sinon la pervivencia mesma de la industria asturiana y del texíu socioeconómicu asturianu en xeneral.

Hai 22 años tuvo llugar na mesma Catedral otru empreslle de trabayadores, nesti casu de los dispidíos de Duro Felguera, que tuvieron allí 318 díes, pente Avientu del 96 y Payares del 97, compaxinando l’empreslle con barricaes y movilizaciones na cai y recuperando finalmente’l so puestu de trabayu.

Llucía F. Marqués