El preslle y regulación d’industries xunto cola fuerte dependencia del turismu fae que’l mercáu llaboral asturianu seya inestable y precariu, con un 91% d’emplegos temporales y un 40% a tiempu parcial

El paru subió esti mes un 3’17%n’Asturies entantu que l’afiliación a la Seguridá Social desplomóse’n 6.469 persones, una cayía del 1’73%, la pior dende qu’entamaron a recoyese datos.

1.778 de los que recien  perdieren el so emplegu provienen del seutor servicios. La industria y l’agricultura y pesca son los siguientes perxudicaos, recuperando emplegos namás el seutor de la costrución, con 122 contratos. La cayía d’emplegu industrial -11.700 cotizantes nuna década- ye especialmente esmolecedora, por ser esti el más estable y meyor remuneráu. La situación de la industria asturiana nun tien previsión de meyorar, ya que perriba de delles empreses esnalen menacies de más dispidos y regulaciones temporales, comu les paraes d’Arcelor o el casu de Vesuvius.

De los emplegos roblaos n’Asturies, 30.742 son temporales y namás 3.018 indefinios, ello ye, que’l 91% de les nueves contrataciones son de calter estremadamente precariu. Arriendes d’ello, medra la tasa d’emplegu a tiempu parcial, alrodiu’l 40% y los sindicatos alvierten del importante volume de contratación fraudulenta: falsos trabayos autónomos, aplicaciones incorreches del SMI y socontrates perbaxo convenios. La estrema brevedá de munchos contratos faenlos pasar de temporales a efímeros, faciendo mui abegoso la estabilidá y la cotización, siendo ello que más de 34.000 persones en paru nun cuenten con prestaciones por desemplegu.

Comu ye vezu, medra con más fuercia el númberu de muyeres en paru, por ser los emplegos femeninos, polo xeneral, los de mayor precariedá y rotación, ya en mui alta proporción cientraos en seutor servicios.

Llucía F. Marqués