Los beneficios del alcuentru moteru -que se cellebrará’n Pravia del 4 al 6 d’Ochobre- tarán destinaos esti añu a la Beca d’Estudiu contra’l Cáncanu Infantil Manuel Barrera
Dende’l so nacimientu, nel añu 2.014, el Moto Alcuentru de la Villa de Pravia entrega’l 100% de los sos beneficios a un fin solidariu. Seique’l primer añu nun se consiguieron más que 200 €, el segundu esta cantidá multiplicóse fasta los 2.700 ya esta tendencia a xorrecer continuó fasta algamar alrodiu d’ocho mil euros de beneficios.
L’añu pasáu los ingresos foron a aparar a l’Asociación de Llucha contra’l cáncanu “Deporte & Cancer Infantil” y con ellos foi posible, non solo invertir n’investigación, sinon l’alquisición d’un ecógrafu pa la xunidá d’Oncoloxía Infantil del HUCA.
Les iscripciones abriránse’l vienres 4 dende les 17:00 dica les 20:30. A les 18:30 tendrá llugar una charra a cargu de Javier Álvarez y darréu el conciertu de Premonition aniciará la folixa propiamente dicha, que cuntará cola participación de Decibelios y DJ Gallu. Pa los que nun quieran durmir ceo, la folixa siguirá de madrugá nel Pub La Cueva.
El Sábadu 5 los moteros fadrán una ruta pel conceyu anantes de la Espicha Motera. La tarde nagurarála la charra de Borja Balbuena y les de Josín Castro y Roberto Naveiras; darréu, una tardi enllena d’arruelu: esibición de Stunt, xuegos moteros, concursu de comida de pimientos, carreres de motos y concursos de llevantamientu de rueda. La música de la tardi -y depués la de la nueche- tará a cargu de 4 Notes. Depués de la cena fadráse una Ruta Nuecherniega con antorches pel cascu urbanu de la villa, que finará al pie del Monolitu Ráfagues al Cielu, onde tendrá llugar l’homenaxe a los moteros finaos.
Pa finar, el domingu habrá una Ruta Mototurística pelos conceyos vecinos, siguía d’una esibición de Stunt y a les 14:30 la ya mítica paellada motera. L’Alcuentru finará depués de la entrega de premios, trofeos y regalos, a les 17:00.
Tolos asistentes podrá esfrutar de zona d’acampada iguada pa la ocasión.
Nel Dos Santos Fernández
This work is licensed under a Creative Commons Attribution 4.0 International License.
