Del 25 al 29 de Setiembre 50 llagares de 12 países darán a conocer los sos productos nun congresu enllenu d’actividaes, tanto pa productores y hosteleros comu pal públicu xeneral, una cita imprescindible pa tolos que deseyen conocer la gran variedá de sidres qu’hai en mercáu: esplumoses –brut, dulces, semiseques y rosaes–, de xelu y de fuéu, auguardientes, sidres ellaboradas con estremaos ingredientes, aperitivos de sidre y les que se presenten en formatos d’un terciu
Güei presentóse na Casa Conceyu de Xixón la novena edición del Salón Internacional de les Sidres de Gala, que se desendolcará a lo largo la selmana que vien.
El SISGA ye una de les cumes más importantes de les sidres de copa a nivel mundial que trae ca añu a Xixón a llagareros, espertos ya importadores d’estremaos países del mundiu. Esti añu amplia la so duración col envís de dar a los llagareros internacionales la oportunidá d’afondar na cultura sidrera asturiana a traviés de visites a llagares y pumaraes y a la sede de la DOP.
Na mañana del vienres 27 de Setiembre el llagar Castañón acoyerá’l concursu SISGA’19 nel que un xuráu internacional -propuestu polos mesmos llagareros- determinará cuales son les meyores sidres de cauna de les categories que participen nel certame: Sidre de copa seco, Sidre de copa semiseco, Sidre de xelu, Cóctel de sidre, Aguardiente de sidre, Sidre de pera, Sidre brut, Sidre esplumoso rosao, Sidre esplumoso semiseco, Sidre espumoso dolce, Aperitivu de sidre, Sidre con tastios, Llicor de sidre y Sidre de fuéu.
Esi mesmu vienres, a les 12:30 hores, tendrá llugar una recepción oficial na Casa Conceyu de Xixón a la que asistirán Ana González, alcaldesa de Xixón; asina comu dos alcaldes de ciudades cheques y un d’Italia.
Pela nueche tendrá llugar la Cena de Gala nel restaurante Amares Gastronomía del hotel NH Xixón y la entrega de los Premios SISGA’19.
Sicasí, l’intre más esperáu pa los xixoneses aportará’l sábadu 28 de Setiembre, cuando tendrá llugar la Tastia Abierta al públicu na Colexata de San Xuan Bautista, na que de 12 a 21 hores tolos ellaboraores ufrirán tasties de los sos productos. La entrada, que cuesta 6 euros, da drechu a una copa cola que prebar bébores vinentes de llugares tan llonxanos comu los Estaos Xunios, España, Xapón, Portugal, Alemania o Italia. Esta edición destaca amás pola importante participación de países bálticos como Letonia, Estonia, Finlandia y Polonia; asína comu pola abondosa representación de la República Checa. Por supuesto asistirán tamién 12 llagares asturianos.
El puntu final pondrálu la xornada orientada a sumilleres profesionales que tendrá llugar el 29 de septiembre nel Restaurante El Duque de Xixón de 10:00 a 14:00 hores, que nesta edición tará cientrada nos auguardientes y llicores de sidre.
This work is licensed under a Creative Commons Attribution 4.0 International License.
