Xixón acueye’l 22 de setiembre una nueva grabación d’esti ciclu de conciertos en formatu mui íntimu -15 persones-, grabaos y emitíos per Internet, qu’entama musicasturiana.com y padrocina Xixón Turismu dientru les aiciones empobinadas a esparder la cultura llocal, una de les esixencies del sellu Biosphere como destín turísticu caltenible. La entrada ye por sortéu
Les presentaciones d’estos discos son con un formatu ente conciertu acústicu con aforu reducíu, programa de televisión y alderique; too ello retresmitíu per Internet pa que llegue a persones de tol mundu. La primer edición abriéronla L-R y Xaime Martínez y, tres l’éxitu algamáu -casi 30.000 reproducciones ente los videos publicaos en YouTube y Facebook-, el 22 de setiembre va haber un nuevu conciertu/grabación con Ún de Grao y D’Urria.
Xixón va acoyer la puesta n’escena d’estes novedaes discográfiques. Ún de Grao presenta ‘Pelo Segao‘, primer llarga duración d’esti veteranu artista de la escena folk onde reinterpreta pieces de tonada y d’otres músiques de raigañu asturianu pa empobinales hacia soníos propios del rock, del jazz o de la bossa nova. Tradición y vanguardia con un estilu personal que fai que cada cantar suene contemporáneu dafechu.
Dende Vil.lablino (Llión) van aportar D’Urria colos cantares que dan forma al so debú ‘En Ca Pla‘. La música tradicional d’un llau y otru d’El Cordal siéntese nes composiciones d’esti cuartetu qu’usa nes sos lletres la variante dialectal del asturianu conocida como pal.luezu. Calidá y orixinalidá son axetivos que definen la personalidá de los dos grupos que protagonicen esta nueva edición d’Amosando, dambos amás nominaos nos Premios AMAS 2019 dientro de la categoría “Mejor Canción Folk”.
Los estudios de Javier Lueje, realizador audiovisual d’Amosando, asitiaos nel barriu xixonés d’El Natahayo, van ser l’escenariu d’esti conciertu/grabación el 22 de setiembre a les 18.30h. La entrada ye de baldre y ta llendada a les 15 persones que ganen una invitación -con Cerveza Caleya y Asturcilla incluyida- participando nun sortéu al traviés de les redes sociales de musicasturiana.com.
En payares va tener llugar la última edición d’Amosando 2019, esta iniciativa novedosa pa sofitar la música asturiana, que bebe d’esperiencies exitoses n’otres partes del mundu y que ta adaptada a les actuales formes de consumir y promocionar la música.
Redaición InfoAsturies
This work is licensed under a Creative Commons Attribution 4.0 International License.
