Cientos de persones percorrieron les cais d’Uviéu esti 8 de Setiembre denunciando los problemes que carez el Pueblu Asturianu y reclamando una República independiente comu camín pa la so solución

El manifestamientu entamó a les puertes del emblemáticu Hotel Reconquista, conocíu por albergar a los galardonaos de los Premios Principiegos, pero conocíu tamién poles llamentables condiciones llaborales que carecen los sos emplegaos.

Ellí mesmo un representante de los trabayadores denunció la so situación, na que non solo son esplotaos sinón que reciben denuncies y acosu por denunciar esa mesma esplotación. Comu exemplu un detalle: por una protesta de 6 menutos reclámenyos 21.000 €, 3.500 por menutu. Esti casu ye un más de los milenta que se viven n’Asturies y valió comu amuesa de la situación de precariedá llaboral y recorte de les llibertaes mesmes de llucha polos drechos. El llunes 16 a les 9 la mañana pue acompangase a estos trabayadores na so revindicación en Llamaquique.

Darréu, tres d’una piqueña marcha per Uviéu, falóse’l tema del espoxigue de les lludopaties y de les cases d’apuestes, una llácara qu’afeuta a toles edaes y estayes sociales pero que se ceba mui fuerte na mocedá y na clas obrera. Les respigantes cifres d’adictos al xuegu amuesen que mos alcontramos ante un problema de salú pública permitíu y sofitáu pol mesmu gobiernu.

La tercer parada dedicóse a les 5 del Naranco, que tamién tan siendo xulgaes por defender los drechos del Pueblu Asturianu, nesti casu el drechu a la vivienda. L’orixe de la denuncia ta na detención d’un desfiuciu nel añu 2.012 na que participaron cientos de persones.

Un ramu de plumeru la pampa enriba mesmo d’un edificiu oficial foi la esculpia pa falar, non solo d’esta plaga que la incompetencia del “Principado” nun ye quien a detener, sinón d’otres munches qu’afeuten a la natura asturiana, denunciando al mesmu tiempu los retayos en servicios, l’esfarrape de los medios de vida y les torgues pa vivir nos pueblos que tan causando’l so despoblamientu.

Finalmente, ya na Plaza l’Ayuntamientu, foi el turnu de les asociaciones de mocedá, que nun pidieron otra cosa qu’un futuru dignu nel propiu país, daqué que la precariedá llaboral y l’ausencia d’espeutatives pon mui abegoso, faciendo de la permanencia n’Asturies un vraeru actu de llucha. De fechu, una de les frases más coreaes nel trayeutu foi “Nun emigramos, quedamos y lluchamos”.

El manifestamientu finó na Plaza’l Paragües, onde tres d’una intervención final tuvo llugar una xinta popular y dellos talleres abiertos.

This work is licensed under a Creative Commons Attribution 4.0 International License.