Ante l’anuncia fecha pol grupu Vesuvius del preslle de la so planta de Llangréu, los trabayaores quemaron neumáticos nos alrodios de la fábrica comu seña de protesta

La direición de la empresa treslladó ayeri al comité d’empresa de la fábrica que Vesuvius tien en Llangréu la so intención d’entamar un ERE el prósimu 12 de setiembre que tendrá comu consecuencia’l despidu de 111 trabayaores. Malque la noticia garró a los afeutaos por sospresa, nun entardaron en reacionar, entamando darréu les protestes nes cais.

La facturación añal de Vesuvius pente les factories d’Asturies y Burgos ye superior a los 44 millones d’Euros , pero xustifiquen el preslle por “escasa rentabilidá de la planta” y la reorganización de la empresa en toa Europa.

La multinacional, con sede nel Reinu Xuníu, tien fábriques en 41 países de los 6 continentes, con una plantiya de 10.809 persones de les que menos de la metá, 4.360, trabayen n’Europa. Nos caberos años recibió importantes cantidaes de dinero d’aides públiques, lo que nun torgó qu’echare  a otros 77 emplegaos va 10 años.

Redaición InfoAsturies

This work is licensed under a Creative Commons Attribution 4.0 International License.