Los condergaos del Casu Marea siguen na cai 10 años depués

  • 5 Setiembre, 2019

Los fechos tan probaos, la sentencia dictada. Los condergaos tan llibres y los asturianos nun recuperamos les perres robaes. El paragües del PSOE ye grande y atecha bien

Diez años depués d’una de les trames de corrupción, alxudicación irregular de contratos y robu de fondos públicos mayores de les munches que chisquen al executivu asturianu y dos años depués de la sentencia, los responsables del “Casu Marea”, con penes de fasta 40 años de cárcele, siguin na cai.

Los 1.079 folios de la sentencia concluyeron, nel 2017, que’l “Principado” albergó efeutivamente una descomanada trama de corrupción na que tan implicaos altos cargos del gobiernu asturianu de la dómina del socialista Vicente Álvarez Areces -que “nun sabía nada”-.

El retrasu na resolución del recursu -nel que la defensa pidi que se consideren illegales les escuches telefóniques y los rexistros fechos na investigación, qu’inculpen ensin llugar a dudes a los acusaos-, continúa demorando l’ingresu na cárcele de los 7 condergaos, que siguen en “llibertá condicional” pesi a que la sentencia de setiembre del 2017 que, con 1.079 folios de prebes concluyó, va dos años, que’l “Principado” albergó una trama de corrupción, con ocho responsables penales pente los que’l xulgau reparte 40 años de prisión y multes que s’averen a los 7 millones d’euros. Amás, quedaba pendiente de calcular l’importe que tienen que devolver a les arques públiques, ya que’l “Principado”, nun nuevu actu de fidelidá a la so xente, nun presentó a tiempu la valoración económica de daños y perdes.

La sentencia conderga al esconseyeru d’Educación José Luis Iglesias Riopedre (PSOE) y al so númberu dos nel departamentu, María Jesús Otero, a 6 y 9 años y medio de prisión, respeutivamente, ya impón tamién 9 años de cárcele a la funcionaria Marta Renedo Avilés pola so participación na trama de alxudicación irregular de contratos.

Amás, foron condergaos a un total de 15’9 años de prisión los cuatro empresarios implicaos nel casu – Alfonso Carlos Sánchez, d’Almacenes Pumarín; Maximino Fernández, de Asac Comunicaciones,Víctor Manuel Muñiz, d’Igrafo; y José Azorín, de Nora Proyectos e Ingeniería- ya un funcionariu del Ayuntamientu de Mieres, al que se-y impuso una multa de 1.800 euros por cofechu.

A estos altores los implicaos continúen cola so vida ensin mayor complicación -esceptuando el preslle de les sos empreses, col consiguiente despidu de los emplegaos de les mesmes, fasta agora los que más caro pagaron por esti casu-. Riopedre avérase a los 80 años, agradeciendo ensin dubia la escasa memoria política de los asturianos y la capa protectora que’l so difuntu collaciu, Areces, dexó bien estendía perriba d’elli.

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies