Fasta 9 delitos se recueyen nel “informe d’analís”, qu’acomuña en más de 400 folios la información de toles dilixencies de la causa de magar el 2013. Blanquee de perres, delitu contra la Facienda pública, falsedá documental, tráficu d’influyencies, delitu societariu por apropiación indebío, prevaricación, cofechu, prevaricación urbanística y marafundiu de caudales públicos

El reciente informe de la UCO (Unidá Cientral Operativa de la Guardia Civil) sobre’l casu Hulla nun dexa llugar a dudes sobre l’orixe de la fortuna de Fernández Villa, que venceya direutamente al xeriátricu de Felechosa, al Montepío y a los Fondos Mineros.

Nel informe afítase que l’orixe de les perres regularizaes por José Ángel Fernández Villa y José Antonio Postigo cola amnistía fiscal del PP nun procedíen d’herencia nin del trabayu, sinon de la xestión delictiva por parte de los másimos responsables del SOMA UGT y del Montepío de la Minería, asina comu de la costrución de la residencia de Felechosa, colos más de 30 millones d’euros de subvención -más sobrecostes- destinaos a esa obra.

La gravedá d’esti casu reside na so repercusión en tol texíu social y económicu’l país, ya que non solo se trata de corrupción, sinon qu’esta triba d’actuaciones llevaron a la ruina y al preslle de la minería asturiana, con tolo qu’ello implica.

“Nun ye namás Villa y Montepío. El casu ye saber quién cobró y cuanto por cada pozu mineru que presllaron, ya’l papel d’Areces y del restu la mafia’l SOMA-PSOE” declaró Paulu Arboleya, Secretariu Xeneral d’Andecha Astur, organización que reclama una investigación seria y esaustiva, qu’algame a tolos los estamentos y na que tolos implicaos asuman la so responsabilidá nos fechos.

Nuria Prendes

This work is licensed under a Creative Commons Attribution 4.0 International License.