Los dies 6 y 7 se Setiembre la Casa’l Pueblu de Xixón acueye’l VI Alcuentru’l Llibru Anarquista d’Asturies

Los organizaores definen l’alcuentru comu “un actu coleutivu pa charrar de los llibros fechos -escritos, distribuyíos, espublizaos y lleíos-, dende abaxu y dende afuera, por persones que son coscientes de la so realidá y de la que-yos arrodia, qu’usen la lliteratura -seya ficcionada o cruda realidá- como l’arma de lliberación qu’enxamás debió dexar de ser, tanto pa denunciar les sos condiciones de vida como p’aprender a texer una escala cola qu’ayudanos a salir del pozu”.

A lo llargo d’estes dos xornaes los autores de dellos llibros de conteníu social, nos que tarán representaos xéneros mui estremaos -poesía, ensayu, cómic, documental, historia, fanzín…_ presentarán la so obra y participarán n’alderiques colos asistentes, dando pie a un interesante foru nel que se tratarán temes tan estremaos y al tiempu tan venceyaos comu la virtú, la industria en Xixón, el nihilismu rusu o Gaspar García Llaviana. La música tampocu va faltar, cola actuación de Dr. Balkan y Al Riad Squad na nueche del vienres.

Redaición InfoAsturies

This work is licensed under a Creative Commons Attribution 4.0 International License.