Diariamente aporten noticies del incumplimientu de l’aplicación de la Llei d’Usu del Asturianu, muy especialmente nel separtáu dedicáu a toponimia, nel que se recueye esplicitamente que la toponimia tradicional asturiana va ser la oficial

L’Asociación Cultual Xeira denuncia que na carretera TC-4, de titularidá municipal, alcuéntrense lletreros indicadores nuevos que traen “Bustelo” (pol oficial “Bustello”), “La Roda” (pol oficial “A Roda”), “San Julián” (pol oficial “San Xuyán”) ou “Santelos” (pol oficial “Santellos”). Les señales lleven la fecha de fabricación d’ochobre del 2018, nueve meses dempués de que s’espublizara nel BOPA (19-1-2018) la toponimia oficial del conceyu de Tapia acordies coles denominaciónes tradicionales.
Remembren al conceyu que nel decretu d’oficialización esplícase claramente qu’a partir de la fecha d’espublización del decretu “esas son as únicas formas oficiales y qu’as administracióis públicas han a ir cambiando a señalización da qu’esta se vaya anovando. É el caso que nos ocupa, polo qu’el Conceyo puxo esos lletreiros a sabendas de que nun taba respetando a llexislación”.
Pa Xeira, la posibilidá de que la contratación de la señalización fore previa nun ye esculpia pa perpetuar la illegalidá “En resume, trátase d’un despilfarro de cuartos públicos gastaos nus lletreiros que perpetúan el desprecio ás formas tradicionales dos topónimos tapiegos”.  Xeira pide seriedá y respetu á la llei, como nun podía ser d’otru xeitu.

Nuria Prendes

This work is licensed under a Creative Commons Attribution 4.0 International License.