Esti vienres saldrá l’alxudicación de 3.300 places de profesores interinos, de los que cuasi’l 40% costitúinlu les 1.166 places ufries a media xornada, munches d’elles en destinos nes “esnales” d’Asturies

Les oposiciones convocaes esti añu nun finaron colos problemes na contratación docente: la tasa d’interinidá caltiense nes mesmes cifres y los colexos ya istitutos llamenten que los problemes de falta de profesoráu nun tan solventaos: hai cientros onde se ya se tan viendo con dificultaes pa sacar alantre los esámenes de setiembre.

La cuestión de la interinidá, de fechu, empeora progresivamente, con tola precariedá qu’implica y dientro d’elli medra ca añu un coleutivu más precariu entá: el del interín a media xornada. En 2012 la convocatoria de docentes con contratos a media xornada foi de 699 places, cuasi la metá que la d’esti añu. Respeutu a les 992 del añu pasáu hebio un aumentu del 17’5% más, lo qu’indica una tendencia a la precarización llaboral na ensiñanza.

El retu al que s’enfrenten estos 1166 profesores consiste’n sobrevivir con mediu sueldu, teniendo que buscar aloxamientu llonxe del so llar o faciendo diariamente llargos desplazamientos y con un trabayu que nun garantiza estabilidá, nin cubre vacaciones, nin muncho menos asegura la continuidá nel añu viniente; cola complicación añadía de tener que recomenzar a organizase periódicamente ante’l cambeu de destín.

La consecuencia direuta y evidente ye la baxa calidá de vida d’estos interinos; la secundaria, la dificultá d’afitase y entamar una familia; la terciaria y non por ello menos emportante, la d’afalar a cientos de mayestros asturianos a guetar puestos de trabayu fuera d’Asturies, onde al menos tean garantizada una estabilidá.

Llucía F.Marqués

This work is licensed under a Creative Commons Attribution 4.0 International License.