El Salón d’Actos de la Casa Cultura de Llugones acoyerá’l prósimu 24 d’Agostu, de magar les 19:00 hores, una muestra de bailles del país y música d’estremaos llugares

L’Agrupación Folklórica “La Sidrina” de Llugones lleva 36 años entamando esta amuesa, que coincide coles Fiestes de Santa Isabel de Llugones y pela que van pasando nestes tres décades más de cien grupos de mui estremaes partes del mundiu. L’envís de los llugonenses ye duple: non solo traer al so conceyu los vezos, músiques y balles d’otres tierres, sinón facer qu’ellos conozan los nuesos, que sientan de cerca la cultura, la música, el calter, la identidá asturiana, creando un venceyu pente los pueblos basáu nel mutuu conocimientu.

Amás de La Sidrina y la so banda de gaites , esti añu participarán los grupos “Virgen de la Guía” de Sta. María del Páramo, en Llión, el “Grupo de Jota Aires Alfindeños” de Puebla de Alfinden, en Zaragoza y el “Rancho Folclórico Arvorense”, de Arvore, en Portugal, llugares onde l’Agrupación Folclórica La Sidrina tamién fizo ya les sos actuaciones, nun prestosu intercambiu.

Previa a la Muestra realizaráse  un Desfile folklóricu qu’entama na Avda de Viella a les 18:30. Los organizadores remembren que tamién habrá procesión y Puya’l Ramu el domingu y que’l llunes ye’l díe’l bollu, que cuntarán tamién cola participación de l’Agrupación.

Redaición InfoAsturies

This work is licensed under a Creative Commons Attribution 4.0 International License.