El cientru de Cultura Antiguu Istitutu de Xixón acueye l’amuesa “Voces, la Llingua n’Asturies al traviés de los Sieglos” l’argumentu definitivu contra cualisquier intentu de trivializar o acusar “d’invención moderna” a la llingua asturiana

Nesta esposición, que surdió l’añu pasáu nel contestu del XIII Centenariu d’aniciu del Reinu d’Asturies y dende entós va esponiéndose n’estremaos escenarios anantes d’aportar a Xixón. recuéyense materiales que demuestren la presencia de la llingua’l país demientres tola so hestoria, con prebes gráfiques que se remonten a va más d’un mileniu y que percuerren la cronoloxía de la llingua al traviés de semeyes, obres orixinales y documentos descubriendo les estremaes etapes y sucesos hestóricos del so pasáu y presente, al tiempu que proyeuten un futuru pa la mesma nel sieglu XXI y vinientes.

75 paneles de grandes dimensiones estremen la amuesa en 7 bloques qu’aparen al visitante en 25 intres hestóricos que Xulio Viejo, coordinador científicu de “Voces” definió comu’l primer rellatu illustráu y global de la llingua asturiana, destacando que “l’asturianu ye una parte del llinguaxe del mundu”. Nel so percorríu ufiértase la posibilidá d’aceder a los sos conteníos, amás de n’asturianu, en castellanu y inglés al traviés de códigos QR; tamién hai disponibles visites guiaes, con cita previa.

Redaición InfoAsturies

This work is licensed under a Creative Commons Attribution 4.0 International License.