El Gobiernu español respuende con mentires y evasives les entrugues feches nel parllamentu, eludiendo les sos responsabilidaes nel fundimientu’l graneleru “Castillo de Salas”
Al traviés del diputáu de la coalición “Agora Repúbliques”, cola qu’Andecha Astur se presentó a les caberes elleiciones, el partíu asturianu presentó al gobiernu de Pedro Sanchez una entruga sobro los estudios fechos pa esclariar la procedencia de les manches de carbón que periódicamente afeuten a la sablera San Llorienzu.
Na so rempuesta, sigún nos comuniquen dende A.A., mienten y tapecen fechos d’importancia sol casu. Per un lláu, desentiéndense de la cuestión allegando que ” la llimpieza, hixene y salubridá de les sableres son competencies municipales”, pero de fechu, los vertíos na mar, la calidá de les agües marines y el caltenimientu les sableres son responsabilidá esclusiva del estáu, “dalgo que silencia’l gobiernu español con enfotu d’engañar a la opinión pública asturiana y tenela aselá nesti casu”. La responsabilidá del estáu nesti casu ye mayor en cuantes que’l fundimientu del graneleru “Castiellu Salas” nel 1986, con un cargamentu de 100.000 tonelaes de carbón, foi una decisión de les autoridaes del intre, qu’alcordaron nun lu rescatar y dexalu fundir nuna fosa na mar abierto pente los cantiles xixoneses, dende onde aporten a la sablera alrodiu de 10 tonelaes añales de carbón.
Na rempuesta que l’Estáu español da a Andecha Astur, al traviés del diputáu Jon Iñarritu, tamién se diz que’l Ministeriu pa la Trensición Ecolóxica nun afaló estudios pa conocer la procedencia d’estes manches de carbón, pero de fechu’l gobiernu españorl (entidá pola que s’entrugaba, y non pol Ministeriu concretu) si fizo estudios sobre’l carbón na sablera, al traviés del “Instituto Nacional de Carboquímica”, dependiente del CSIC y, nesa considición, dependiente del Ministeriu de Ciencia, Anovación y Universidaes. D’esos estudios despréndese que les manches de carbón de San Llorienzu proceden del bueque que l’Estáu español fundió de mou irresponsable énte la costa xixonesa.
Les consecuencies del fundimientu del “Castillo de Salas” van más allá de la evidente llaceria mediuambiental que dañó irreversiblemente la fauna y flora mariños de la costa xixonesa, sinon tamién económica. Poro, Andecha Astur píde-y al Conceyu Xixón que polo menos desixa a Madrid l’asunción de la responsabilidá económico, tantu de los gastos que’l Conceyu Xixón vien asumiendo por mor del fundimientu’l “Castillo de Salas” énte la costa xixonesa (investigación, xixilancia de les agües, análisis d’agües y arenes, llimpieza la sablera, etc), asina comu una indemnización pol determín enquivocáu de fundir el buque énte los sos cantiles, con toles consecuencies mediuambientales que Xixón carez por esi fechu.
Al Gobiernu d’Adrián Barbón piden-y “que nun se ponga de cantu, escusándose con que ye un problema ente alministración municipal y estatal. Y que sofite con determín al Conceyu Xixón na desixencia de les pertinentes compensaciones económiques pol atentáu ecolóxicu que l’Estáu prevocó n’agües marítimes asturianes”.
Llucía F. Marqués
This work is licensed under a Creative Commons Attribution 4.0 International License.
