La 49 edicion tien talleres pa la reciella nes llingues del Festival

L’Espace Parole del FIL 2019 ye ún de los entornos preferíos poles families que visiten estos díes la capital intercéltica del sur de Bretaña. Xuntu colos talleres esprés de llingua y cultura bretona, hai ponencies sobro creación lliteraria y xuegos pa los más pequenos.

Dientro tola ufierta dirixía a los neños, tan les actividaes de xermanamientu ente les cultures que componen la rede intercéltica. Ehí, los críos más mozos puen dar los primeros pasos en bretón, cornuallés, manés, galés… Y, dende llueu, n’asturianu.

Ye un primer averamientu a llingues de los países celtes, qu’ufre la posibilidá d’ampliar pallabreru nuna llingua cola que d’avezu el públicu nun tien munchu contautu. Dau que l’envís cimeru del festival ye l’interceltismu, foméntense los viaxes pente les naciones que participen nel festival. Asina xenérense más ferramientes pa la comunicación ente los pueblos atlánticos.

La zona ta teniendo perbona acoyía pol públicu xeneral. Amás de tener entretenía a la reciella, puen consultase obres de referencia comu dicionarios nes llingues yá mencionaes y clásicos de les nueses lletres.

Aymara González Montoto

This work is licensed under a Creative Commons Attribution 4.0 International License.