Inaciu Galán, escritor asturianu y fasta va pocu presidente d’Iniciativa pol Asturianu, busca collaboración pa completar la so tesis doctoral con casos concretos de represión llingüística nos tiempos de Franco

Esta recoyida de datos ta dirixía a persones que foren educaos nel tiempu del franquismu, ello ye, que tuvieren escolarizaos pente’l 1937 ya’l 1075. L’envis de la mesma ye conocer de primer man el tratu que se-y daba n’aquella dómina a la llingua asturiana, especialmente na escuela pero tamién fora del ámbetu académicu, teniendo en cuenta que yera la llingua materna predominante de los escolinos n’aquel intre y pa munchos la única llingua que conocíen.

Pa participar nel estudiu namás hai qu’entrar nel enllaz y retrucar a una decena d’entrugues cencielles. Los datos recoyios pasarán -de mena  anónima- a formar parte de la tesis doctoral d’Inaciu Galán, que versa sobro «La situación del asturianu nel Franquismu» y que recueye de manera documentada la discriminación y represión llingüística asocedíos nos tiempos de la dictadura, que tan graves consecuencies tuvo sobro l’autoestima identitaria y llingüística de los asturianos.

El cuestionariu ye curtiu y rápidu de facer, seique a la fin del mesmu déxase abierta la posibilidá d’una futura entrevista personal p’afondar más nel tema si l’entrevistáu/a ta d’alcuerdu.

Redaición InfoAsturies

This work is licensed under a Creative Commons Attribution 4.0 International License.